A Axencia Tributaria convocou probas de aptitude para representante aduaneiro. Pode presentarse calquera persoa que cumpra os requisitos, pero quen teña o título de Técnico/a Superior en Transporte e Loxística ou de Comercio Internacional queda exento/a da proba teórica. Prazo de solicitude: ata o 30 de setembro de 2026.
Que é un representante aduaneiro
É un profesional habilitado para actuar ante a Aduana en nome doutras persoas ou empresas: presenta declaracións aduaneiras e xestiona os trámites de importación e exportación de mercadorías, en representación directa ou indirecta segundo o Código Aduaneiro da Unión Europea. Para exercer é necesario obter esta capacitación mediante unhas probas de aptitude que convoca a Axencia Tributaria.
A convocatoria 2026
A Axencia Estatal de Administración Tributaria convocou estas probas mediante a Resolución do 23 de xullo de 2026 (BOE núm. 185, do 30 de xullo), conforme ao artigo 4.2.a) do Real Decreto 335/2010. Non teñen unha periodicidade fixa — a convocatoria anterior foi en 2024 —, así que paga a pena estar atento/a cando se abren novas.
Vantaxe para o alumnado de Transporte e Loxística e Comercio Internacional
A convocatoria está aberta a calquera persoa que cumpra os requisitos xerais, non é exclusiva para quen teña un título determinado. Pero quen acredite o título de Técnico/a Superior en Transporte e Loxística ou Comercio Internacional queda exento/a da proba teórica: dáse por superada automaticamente e só é necesario presentarse á proba práctica.
En que consisten as probas
- Proba teórica exenta para quen teña o título de Transporte e Loxística: cuestionario de 100 preguntas, máximo 3 horas, apto/a con 50 acertos
- Proba práctica obrigatoria para todos/as: supostos prácticos, máximo 4 horas, só se fai tras superar ou quedar exento/a da teórica
Requisitos e presentación
- Ser maior de idade
- Estar establecido/a en España ou noutro Estado membro da Unión Europea
- Non estar inhabilitado/a para exercer actividades de representación ante a Aduana
- Presentación exclusivamente electrónica, na sede electrónica da Axencia Tributaria con certificado electrónico, DNIe ou Cl@ve Móbil (modelo 791)
- Taxa de dereitos de exame: 46,65 € exentas as persoas con discapacidade igual ou superior ao 33 % e as vítimas do terrorismo
As solicitudes pódense presentar ata o 30 de setembro de 2026, incluído.
Consultar a resolución completa no BOE
As probas realízanse en Madrid e, segundo o número de persoas admitidas, tamén en Barcelona, Las Palmas de Gran Canaria, Sevilla ou Valencia.